అమెరికా అధ్యక్ష ఎన్నికల్లో డెమొక్రాటిక్ పార్టీ అభ్యర్థిగా ప్రస్తుత ఉపాధ్యక్షురాలు, భారత సంతతికి చెందిన కమలా హారిస్ పోటీ చేయడం ఖాయమైంది. తన అభ్యర్థిత్వాన్ని ఆమె సోషల్ మీడియా ద్వారా అధికారికంగా వెల్లడించారు. ఇందుకు సంబంధించిన పత్రాలపై సంతకం చేశానని, అధ్యక్ష ఎన్నికల్లో పోటీ చేస్తున్నానని ఆమె ఎక్స్ (ట్విట్టర్)లో పేర్కొన్నారు. పార్టీలోని అన్ని ఓట్లూ పొందేందుకు తాను కృషి చేస్తానని, నవంబర్లో ప్రజాబలంతో నడుస్తున్న ప్రచారమే గెలుస్తుందని ఆమె విశ్వాసం వ్యక్తం చేశారు. ఇదే సమయంలో రిపబ్లికన్ పార్టీ అభ్యర్థి, మాజీ అధ్యక్షుడు డొనాల్డ్ ట్రంప్తో డిబేట్కు తాను సిద్ధమేనని కమలా హారిస్ ప్రకటించారు.
ప్రస్తుతం కమలా హారిస్కు అమెరికా అధ్యక్షుడు జో బైడెన్తో సహా డెమొక్రాట్ పార్టీలో మెజార్టీ నాయకులు మద్దతు పలుకుతున్నారు. అమెరికా మాజీ అధ్యక్షుడు బరాక్ ఒబామా దంపతులు, ప్రతినిధుల సభ మాజీ స్పీకర్ నాన్సీ పెలోసీ లాంటి సీనియర్లు ఆమెకు మద్దతు ప్రకటించారు.కానీ, కమలాను గతవారం బైడెన్ నామినిగా ప్రకటించినా.. ఆమె అభ్యర్థిత్వం గురించి ఒబామా స్పందించకపోవడంతో ఆయన అసంతృప్తిగా ఉన్నట్లు ఊహాగానాలొచ్చాయి. వాటికి తెరదించుతూ హారిస్తో ఒబామా దంపతులు ఫోన్లో మాట్లాడారు. ‘‘మా స్నేహితురాలు కమలా హారిస్కు నేను, మిషెల్ కొద్ది రోజుల కిందట ఫోన్ చేశాం. ఆమె అమెరికాకు అధ్యక్షురాలు అవుతారని మేం భావిస్తున్నాం.. మా పూర్తి మద్దతును ఆమెకు తెలియజేశాం. నవంబరు 5న జరగనున్న అధ్యక్ష ఎన్నికల్లో కమల గెలవడానికి ఏమైనా చేస్తాం. మీరు కూడా మాతో చేరుతారని ఆశిస్తున్నాం’ అంటూ కమలా హారిస్తో జరిగిన ఫోన్ సంభాషణ వీడియోను ఒబామా షేర్ చేశారు.
ఇక, అమెరికా అధ్యక్ష ఎన్నికల్లో కమలా హ్యారిస్ పేరు బైడెన్ ప్రతిపాదించిన తర్వాత సమీకరణాలు మారిపోతున్నాయి. తాజాగా వెలువడిన సర్వేల్లో ట్రంప్ కంటే కమలా హారిస్ ముందంజలో ఉన్నట్టు వెల్లడయ్యింది. ఈ ఉత్సాహంతోనే ఆమె మరింత జోరుగా ప్రచారం చేస్తున్నారు. గురువారం రాత్రి కమల కోసం నిర్వహించిన ఓ జూమ్ కాల్లో ఏకంగా 1,64,000 మంది మహిళలు పాల్గొని, విరాళాలను అందజేశారు. 90 నిమిషాల పాటు సాగిన ఈ జూమ్ కాల్లో ఏకంగా రూ.16.74 కోట్ల పైగా విరాళాలు అందాయి. ‘వైట్ ఉమన్: ఆన్సర్ ద కాల్’ పేరిట కమలకు మద్దతుగా నిర్వహించిన ఈ కార్యక్రమం జూమ్ చరిత్రలోనే అతిపెద్ద గ్రూప్ కాల్గా రికార్డు సృష్టించింది.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్స్టైల్ అప్డేట్లు మొదలగునవి తెలుసుకోండి. వీడియోలను TimesXP లో చూడండి. 2024-07-27T07:03:25Z dg43tfdfdgfd